Protokoll Niitsiku kõrtsimehe Karl Tensingu nõudest Daneil Operi vastu 
varastatud raha ja väärtpaberite asjas.

16.10.1867:76

Ette tulli Niitsiku kõrtsimees Karl Tensing ja ütel: et sel öösel 12. vasta 13. s.k. 
päival om temal kõrtsi kauba kambrest 5 rubla pileti hõbe nink vask rahaga 
kokko, nink 4 Tresorscheini mes ega üts 50 rubla see om üle keige 250 rubla ilma 
eendreseta ära varastut. Varas oles saina alt sisse tullu keldrede ja keldre luugi 
üles tõstnu, ja säält kambrede lännu. Sinna keldre mugu manu om üts vöö maha 
jäänu, ja Abram Oinatsi naine Okka oles ütelnu et tema kate aasta eest Daniel 
Operile om nii sugutse vöö kudunu. Ka ütel kõrtsimees kui tema om ahju 
tegemise man töön ollu om Daniel Oper iks sääl ümbre käinu nink oles ka kauba 
kambren käinu nink nännu et kõrtsimehel om raha sääl ollu, nink möldri tütrik 
Okka om kõrtsimehe tütruku Hels Obrandile et möldre sulane Andri Oper, Daniel 
Operi veli om ka see õdago kodust ära lännu ja tule tiku üten võtnu ja ütelnu 
möldre tütruk Okkale et tema kodo ei tule ja lätt oma velle Danieli poole ja laseb 
sääl hendale pöksi lõigata. Ka oles möldri tütrik kõrtsimehe tütrikule ütelnu et 
tõine möldre sulane Ignas Jagolev oles homungu Andri Operi käest küsinu kos sa 
see ööse ollit sis om Andri ütelnu et tema om rehen maganu.
Ette tulli Andri Oper ja ütel et tema om sel 12. vasta 13. s.k. ööse kodo maganu ja 
ei ole kohegi saanu kui ennegi 5 minutit aiga õdago om tema rehe man käinu oma 
jala rätte peran.
Ette tulli Daniel Oper ja ütel et tema om sel 12. s.k. päival küll kodo ollu ja tema 
naine oles kõrtsiman suppi keednu et kodu oles rehi ülevan ollu sis oles tema küll 
ka kõrtsimehe kauba kambren käinu ent ei ole kedagi suurt raha kõrtsimehel 
nännu. Nink ütel; et temal ei ole ka vööd mitte ära kadunu, nink tema veli Andri ei 
ole mitte see ööse tema man käinu.
Kõrtsimehe tütruk Hels Dobrand ütel: et möldre tütruk Okka oles ütelnu et Andri 
Oper om tule tikut võtnud ja kodust ära läänu. Möldre tütrik Okka ütles: et Andri 
om tema käest tule tikka küsinu, ja ütelnu et tema lätt sõsara poole pökse lõigama, 
ent kui Okka om magama lännu sis om Andri jo sängin maganu, nink Andri om 
küll ütelnu kui kodust ära lännu et tütrigu võiva tema sängi magama heidata et 
tema nii pea tagasi ei saa, ja tõine tütrik Kullu om temale ütelnu et Andri om 
Iknassele ütelnu et tema rehe man käinu.
Tõine möldre tütrik Kullu ütel, et Andri om pääle õdago söögi tikut võtnu ja 
ütelnu, et tema lähab sõsara poole pökse lõigama, ja perast kui nema om magama 
lännu om Andri jo sängin maganu. Ja Andri om küll enne ära minekit tütrikile 
ütelnu et võiva tema sängi magama heida et tema nii pea tagasi ei saa.
Mölde sulane Iknas ütel, et tema ei ole Andri käest midagi küsinu nink ei tija 
midagi.
Abram Oinatsi naine Agasja ütel et see vöö mes sääl keldre mulgo man om leido 
om tema esi 2 aasta eest kudunu tema om 5 vööd Daniel Operi naisele üte kõrraga 
kudanu Daniel Operi naine om temale masnu 10 kop raha ja 1 matt suurmit 
palga.
Et see kohus seda asja mitte seletata es või sis palleb see kohus üte keiserliku 
Ordnungsrichti kohut seda asja seletata.